BALOZI WA PAMBA AMALIZA ZIARA BARIADI DC

Posted on: November 27th, 2022

Balozi wa Pamba nchini Mh. Aggrey Mwanri leo amemaliza ziara katika Halmashauri ya Wilaya ya Bariadi kwa kufanya mikutano katika vijiji vitano vya Nkindwabiye, Halawa, Sapiwi, Igegu na Igegu magharibi.

Akiwa katika ziara hiyo licha ya kuwasisitiza wakulima kuzingatia kanuni za kilimo bora cha pamba pia aliwakumbusha wakulima hao kuwa zao la Pamba ni miongoni mwa mazao ambayo huweza kumuingizia mkulima kipato kikubwa.

Balozi huyo aliendelea kubainisha kuwa endapo wakulima wengi watalima zao la Pamba kwa tija itawasaidia kuuza mazao yao mengine kwa bei nzuri kwani hawatakuwa na ukata utakaowasukuma kuuza mazao mengine kama mahindi na mpunga kwa bei ya chini.

“Wakija walanguzi kununua mazao yenu hamtaweza kuuza kwa bei ya kutupa, mtasubiri mpaka mazao hayo yatakapo adimika ndipo mtakapoweza kuuza” alisisitiza Balozi Mwanri

Balozi wa Pamba kitoa hamasa kwa wananchi wa kijiji cha Chungu cha Bawawa kilichopo Halmashauri ya Wilaya ya Bariadi

Aidha wakati wa ziara hiyo Balozi Mwanri aliweza pia kuwaonesha jembe la kupalilia pamba linalovutwa na wanyama kazi linavyoweza kufanya kazi ya kupalilia pamba ambayo imepandwa katika mstari na kuzingatia vipimo vya sentimita 60 kwa 30. Balozi huyo aliongeza kuwa jembe hilo huweza kuongeza ufanisi kwani linauwezo wa kupalilia wastani wa hekari tatu kwa siku.

Afisa Ugani wa Halmashauri ya Wilaya ya Bariadi akitoa maelekezo yanayohusu kilimo cha Pamba

Baada ya ziara ya Balozi wa Pamba katika Halmashauri ya Wilaya ya Bariadi  ataelekea wilaya ya Itilima kwaajili ya kuendelea kuhamasisha wakulima waweze kulima pamba kisasa na kwakuzingatia kanuni zote muhimu.