BALOZI WA PAMBA NCHINI AANZA ZIARA BARIADI DC

Posted on: November 26th, 2022

Aliyekuwa mkuu wa Mkoa wa Tabora Ndg. Aggrey Mwanri ambaye ndiye Balozi wa Pamba nchini leo ameanza ziara katika Halmashauri ya Wilaya ya Bariadi na kufanya mikutano na wakulima wa Pamba wa vijiji vya Chungu cha Bawawa, Mwasinasi, Mwasilimbi na Ihusi.

Lengo la ziara ya Balozi huyo ni kuhamasisha wakulima wa Mikoa inayolima Pamba nchini kulima pamba kwa kuzingatia kanuni kumi za kilimo bora cha pamba ili kuleta tija kwa wakulima wa zao hilo.

Balozi wa Pamba akiwa na Viongozi kutoka kata ya Nkololo kijiji cha Chungu cha Bawawa

Balozi Mwanri katika mikutano yake aliwaeleza wakulima kinagaubaga juu ya kanuni hizo na umuhimu wa kuzingatia kila kanuni. Miongoni mwa kanuni ambazo Balozi huyo aliwaelezea wananchi ni pamoja na kung’oa na kuchoma moto masalia na miti ya pamba ya msimu uliopita, kupanda kwa kufata vipimo sahihi (sentimita 60 kwa 30), kutumia samadi wakati wa upandaji na kutochanganya Pamba na mazao mengine.

Balozi wa Pamba na timu yake wakimsikiliza na kumshauri mkulima aliyezingatia upandaji wa pamba kwa mstari

Naye Paulo Nkinda ambaye ni miongoni mwa wakulima waliohudhuria mkutano wa Balozi Mwanri kutoka kijiji cha Ihusi  alisema “Leo tumepata mafunzo mazuri sana kuhusu kilimo cha Pamba, tunaahidi kuzingatia mafunzo tuliyopewa ili yatusaidie tuweze kupata pamba nyingi zaidi”

Ziara ya Balozi Mwanri katika Halmashauri ya Wilaya ya Bariadi itafanyika kwa muda wa siku mbili katika vijiji ambavyo katika msimu uliopita havikufikiwa. Atakapohitimisha ziara hii katika Halmashauri ya Wilaya ya Bariadi Balozi Mwanri atafanya kikao cha Wilaya kwaajili ya Majumuisho ili kuruhusu mjadala na kupokea mawazo mbalimbali kutoka kwa wadau wa Pamba waliopo Wilayani ya Bariadi.