DC BARIADI AWASIHI WANANCHI KUENDELEA KUCHUKUA TAHADHARI DHIDI YA UVIKO-19

Posted on: October 25th, 2022

Mkuu wa Wilaya ya Bariadi Mh. Lupakisyo Kapange amewataka wananchi wa Wilaya ya Bariadi kuendelea kuchukua tahadhari dhidi ya Ugonjwa wa Uviko-19.

Mh. Kapange alitoa rai hiyo katika kikao cha Afya ya Msingi (PHC) kilichofanyika Hospitali ya Wilaya ya Bariadi iliyopo kata ya Dutwa Halmashauri ya Wilaya ya Bariadi. Kikao hicho kiliwakutanisha wadau mbalimbali wa Afya kutoka Wilaya ya Bariadi lengo kubwa likiwa ni kujadili mikakati na namna ya kutoa hamasa kwa wananchi kwenye zoezi la utoaji wa Chanjo ya Uviko-19 kwa watu wenye umri wa miaka 18 na kuendelea lililoanza tar 24/10/2022 na linalotarajia kumalizika tarehe 30/10/2022.

Wajumbe wa kikao cha Afya ya Msingi (PHC) wakiwa kikaoni katika Ukumbi wa Hospitali ya Wilaya ya Bariadi iliyopo Dutwa

Mh. Kapange alibainisha kuwa kwasasa mwamko wa wananchi wengi kuhusu kuchukua tahadhari dhidi ya maambukizi ya Ugonjwa wa UVIKO-19 umekuwa chini jambo ambalo alisisitiza kuwa linahitaji elimu izidi kutolewa kwa wananchi na kupinga imani potofu iliyojengeka kuwa chanjo hii ina madhara kiafya.

“Niwashuru kwa kazi njema mliyoifanya ila tuongeze wigo wa Elimu kwenye upande wa UVIKO kwasababu ugonjwa huu upo haujaisha, kwahiyo Elimu iendelee kutolewa. Sasa hivi watu wamejisahau hata kwenye mikusanyiko hakuna anayejali barakoa, hakuna anayejali Sanitaiza…” Alifafanua Mh. Kapange

Katika taarifa za Halmashauri za Mji wa Bariadi na Wilaya ya Bariadi zilizosomwa mbele ya Mkuu wa Wilaya huyo zilibainisha kuwa kwa sasa katika Wilaya ya Bariadi hakuna mgonjwa aliyebainika kuwa na maambukizi ya UVIKO-19 hivyo lengo la zoezi hili la utoaji chanjo ni kuwafikia kundi ambalo hawajachanja ikiwa ni njia ya kuchukua tahadhari dhidi ya maambukizi ya ugonjwa huo.

Wajumbe wa PHC wakiwa kwenye kikao, Mwenyekiti akiwa ni Mkuu wa Wilaya ya Bariadi Mh. Lupakisyo Kapange

Chanjo ya Uviko 19 katika Wilaya ya Bariadi awamu hii inatolewa Katika vituo mbalimbali kama Vile Vituo vya Afya vya Byuna na Muungano pamoja na Zahanati za Masewa, Nyamswa, Nkololo, Ikungulyambeshi , Bunamhala na Mwakibuga.