KAMATI YA UCHUMI, UJENZI NA MAZINGIRA YATEMBELEA MIRADI YA JOSHO NA KIKUNDI CHA KILIMO CHA UMWAGILIAJI

Posted on: April 13th, 2023

Kamati ya Uchumi, Ujenzi na Mazingira ya Halmashauri ya Wilaya ya Bariadi imefanya ziara kukagua miradi mbalimbali ya maendeleo ikiwemo Ujenzi wa Josho katika kijiji cha Mwahalaja kata ya Ikungulyabashashi na kikundi cha vijana kinachojishughulisha na kilimo cha umwagiliaji.

Wakati wa ukaguzi wa mradi wa ujenzi, Afisa Mtendaji wa Kata ya Ikungulyabashashi Bi. Mariam Daudi alisoma taarifa ya Ujenzi wa Josho hilo iliyobainisha kuwa Ujenzi huo umetekelezwa kwa Ushirikiano kati ya Wizara ya Mifugo na Uvuvi, Halmashauri pamoja na Jamii ambapo thamani ya mradi ni Tsh.27, 000,000 ikiwa Wizara ya Mifugo na Uvuvi imetoa kiasi cha Tsh. 18,000,000, Halmashauri Tsh. 4,000,000 na Jamii ilichangia kiasi cha Tsh. 5,000,000.

Afisa Mtendaji wa Kata ya Ikungulyabashashi Bi. Mariam Daudi akisoma taarifa ya ujenzi wa Josho kwa wajumbe wa kamati ya Uchumi, Ujenzi na Mazingira

Baada ya kupokea taarifa hiyo Kamati ilipongeza juhudi za Serikali pamoja na wananchi wa eneo hilo kwani Josho hilo litasaidia kudhibiti magonjwa yanayotokana na kupe kama vile kukojoa damu, Ndigana baridi pamoja na kizunguzungu. Aidha kamati hiyo iliwaasa wananchi kutunza mradi huo ili ulete tija kwa wafugaji waliopo katika kijiji hicho na maeneo ya jirani.

Wajumbe wa Kamati ya Uchumi, Ujenzi na Mazingira wakikagua shughuli za kilimo cha umwagiliaji zinazofanywa na kikundi cha Vijana "Mkombozi"

Sehemu ya shamba la kikundi cha "Mkombozi Vijana" kilichopo kijiji cha Nkindwabiye wilayani Bariadi

Sambamba na kutembelea mradi wa Josho kamati hiyo pia ilitembelea mradi wa kikundi cha Vijana kiitwacho “Mkombozi Vijana” ambacho hujishughulisha na kilimo cha Umwagiliaji katika kijiji cha Nkindwabiye, kikundi hicho kilipewa mkopo wa Tsh. 8,000,000 na Halmashauri ya Wilaya ya Bariadi, mkopo huo ni miongoni mwa mikopo ya asilimia 10 inayotolewa kwa Wanawake, Vijana na Watu wenye Ulemavu.

Ziara ya Kamati ya Uchumi, Ujenzi na Mazingira hufanyika kila baada ya miezi mitatu ikiwa ni sehemu ya ufuatiliaji wa miradi mbalimbali ya maendeleo inayotekelezwa katika Halmashauri.