MBUNGE DKT.KAIJAGE ATETA NA WATUMISHI BARIADI

Posted on: July 19th, 2024

AELEZA MAFANIKIO YA SERIKALI YA DKT.SAMIA

AWATAKA WATUMISHI KUJIANDIKISHA, KUHAMASISHA WANANCHI KUSHIRIKI UCHAGUZI WA SERIKALI ZA MITAA.

Bariadi,

Mbunge wa Viti maalumu anayewakilisha Wafanyakazi Bungeni Mhe.Dkt.Alice Kaijage amewataka Watumishi wa Umma  Mkoani Simiyu  kuunga mkono  kazi kubwa anayoifanya Rais wa Jamhuri ya Muungano wa Tanzania Mhe.Dkt.Samia Suluhu Hassan katika kuleta maendeleo Nchini kwa kufanya kazi kwa bidii na uaminifu.

Dkt.Kaijage ameyasema hayo jana alipokutana na kuzungumza na Watumishi wa Umma katika Halmashauri ya Mji wa Bariadi katika ziara yake Mkoani Simiyu yenye lengo la kusikiliza  kero mbalimbali za Watumishi.

Amewaeleza Watumishi wa Umma Bariadi kuwa katika kipindi cha miaka 2.8 ya Rais Dkt. Samia licha ya kutekeleza miradi mikubwa  Nchini, ameboresha  stahiki mbalimbali za Watumishi wa Umma ikiwemo upandishaji wa vyeo  pamoja na utoaji wa Ajira katika Kada mbalimbali.

Aidha Dkt.Kaijage amewataka Watumishi wa Umma Wilayani Bariadi kuwa mstari wa mbele kujiandikisha katika Daftari la kudumu la wapiga kura ili waweze kushiriki kikamilifu katika uchaguzi wa Serikali za Mitaa

Amewataka pia kutoa Elimu kwa Wananchi juu ya umuhimu wa kushiriki katika uchaguzi wa Serikali za Mitaa ili kupata Viongozi bora katika Mitaa hatua itakayochochea maendeleo.