TASAF YAENDELEA KUTEKELEZA MIRADI YA UJENZI BARIADI DC

Posted on: January 23rd, 2023

Mfuko wa Maendeleo ya Jamii (TASAF) umeendelea kutekeleza miradi mbalimbali ya ujenzi katika Halmashauri ya Wilaya ya Bariadi inayofadhiliwa na Jumuiya ya nchi zinazozalisha mafuta duniani (OPEC).Miradi hii ya TASAF hutekelezwa kwa awamu ambapo katika awamu ya kwanza halmashauri ya Wilaya ya Bariadi ilianza kwa kutekeleza ujenzi wa  Bweni la wanafunzi 80 katika Shule ya Sekondari Nyasosi, Ujenzi wa zahanati ya Kijiji cha Chungu cha Bawawa, Ujenzi wa nyumba ya mtumishi wa afya katika kituo cha afya matongo na ujenzi wa maktaba ya wanafunzi 80 katika sekondari ya Nyasosi.

Nyumba ya Mtumishi wa Shule ya Sekondari Gambosi iliyojengwa na Mfuko wa Maendeleo TASAF

Miradi hii ya awamu ya kwanza imekamilika kwa asilimia zaidi ya 85.Katika awamu ya pili TASAF imeanza kutekeleza miradi mbalimbali ikiwemo ujenzi wa madarasa mawili na Ofisi pamoja na matundu sita ya vyoo katika shule za msingi za Masewa B, Isuyu na Mwaumatondo kila mradi ukiwa na thamani ya shilingi 69,030,945.62Vilevile katika awamu hii ya pili TASAF inatekeleza mradi wa ujenzi wa Nyumba ya watumishi wa elimu katika shule ya sekondari Gambosi yenye thamani ya shilingi 63,327,922.08 na nyumba ya Mtumishi wa afya katika kituo cha afya Byuna mradi wenye thamani ya shilingi 56,214,732.14

Mratibu wa Mpango wa TASAF Halmashauri ya Wilaya ya Bariadi Bw. Marco Makungu amebainisha kuwa katika miradi yote inayoendelea kutekelezwa ubora wake ni wakuridhisha na usimamizi wa karibu unaendelea ili kuhakikisha inakamilika kwa wakati ili iweze kuongeza tija katika sekta za elimu na afya.