WADAU KUTOKA KATA 09 ZA BARIADI DC WAJENGEWA UWEZO JUU YA UTEKELEZAJI WA MRADI WA BOOST

Posted on: May 2nd, 2023

Wadau mbalimbali wakiwemo Maafisa Watendaji wa Kata na Vijiji, Maafisa Elimu kata, Walimu wakuu na Wenyeviti wa kamati za shule kutoka kata 09 ambazo zitatekeleza miradi mbalimbali ya ujenzi kupitia mradi wa Boost wamefanya kikao kazi cha kuwajengea uwezo namna ya utekelezaji wa miradi hiyo.

Baadhi ya masuala ambayo yamesisitizwa katika kikao kazi hicho ni pamoja na kuzingatia ubora wa vifaa ulioelekezwa, kuzingatia taratibu za kifedha na manunuzi pamoja na umuhimu wa ushiriki wa jamii katika kutekeleza miradi hiyo.

Ndaro Mohamed ni miongoni mwa Watendaji wa Kata walioshiriki katika kikao hicho amesema kimewaongezea uelewa juu ya taratibu za utekelezaji wa miradi mbalimbali kutokana na kuwakutanisha pamoja wadau mbalimbali na kubadilishana uzoefu.

Washiriki wa kikao kazi wakiwasikiliza watoa mada mbalimbali kutoka timu ya Wataalamu ya Halmashauri ya Wilaya ya Bariadi

Kupitia mradi wa Boost Halmashauri ya Wilaya ya Bariadi imepokea fedha Shilingi Bilioni 1.7 kwaajili ya ujenzi wa miundombinu mbalimbali katika sekta ya Elimu (Shule za Msingi) kama vile ujenzi wa Shule mpya mbili, Ujenzi wa Madarasa ya Awali ya mfano na ujenzi wa vyumba vya madarasa shule mbalimbali ambapo imefanya jumla ya madarasa yote yatakayojengwa kuwa 56 pamoja na Matundu ya vyoo 73.

Mradi wa Boost ni sehemu ya mpango wa lipa kulingana na matokeo katika Elimu (EP4R) unaolenga kuboresha mazingira ya ujifunzaji na ufundishaji ambao utaenda sambamba na utekelezaji wa shughuli mbalimbali kama vile ujenzi wa vyumba vya madarasa, ununuzi wa vifaa vya kisasa vya kujifunzia na kufundishia pamoja na kuongeza uandikishaji wa wanafunzi wanaojiunga na darasa la awali na msingi.