WAZIRI WA KILIMO AHITIMISHA KILELE CHA WIKI YA CHAKULA DUNIANI ILIYOFANYIKA KITAIFA MKOANI SIMIYU

Posted on: October 16th, 2022

Waziri wa Kilimo Mh. Hussen Bashe amehitimisha kilele Cha Wiki ya Chakula Duniani iliyofanyika Mkoani Simiyu Wilayani Bariadi. Waziri Bashe alipata fursa ya kutembelea mabanda ya Wadau mbalimbali wa Kilimo kama vile Wizara ya Kilimo, Vituo vya tafiti za Kilimo pamoja na Wajasiriamali walioonesha bidhaa mbalimbali.

Waziri Bashe akitembelea mabanda ya Maonesho yaliyokuwa katika maadhimisho ya Wiki ya Chakula Duniani iliyofanyika kitaifa Mkoani Simiyu

Wakati anatoa hotuba yake Waziri Bashe alisisitiza wakulima wote lazima wasajiliwe katika Mfumo maalum utakaowezesha kutambulika na kupunguza wizi na udanganyifu unaofanywa na baadhi ya Viongozi wasio waaminifu wakati wa ugawaji wa Pembejeo za kilimo.

Aidha Waziri Bashe amewasisitiza Maafisa Ugani kuonesha mfano kwa wakulima wengine kwa kuanzisha mashamba darasa ambayo yatasaidia wakulima hao kujifunza kwa vitendo kanuni bora za kilimo kwa mazao mbalimbali.

Waziri Bashe akipewa maelezo kuhusu Masuala ya Lishe na Mlo kamili kwenye moja ya Banda alilotembelea

Wakati anahitimisha Waziri Bashe pia aliwaasa wakulima kutotegemea zao moja kwani inapotokea zao hilo kutofanya vizuri kwa sababu mbalimbali mkulima hukosa zao mbadala litakaloweza kumuokoa “Mkulima wa Pamba ni lazima awe na Alizeti, mkulima wa Pamba ni lazima awe na Mahindi, na sisi kama Wizara tutawaletea mbegu bora za Alizeti ili muweze kuwagawia wakulima katika mkoa huu ili wawe na zao zaidi ya moja” alisisitiza Waziri Bashe.

Waziri Bashe akiwa kwenye Banda la taasisi ya Kilimo Tanzania (TARI)

Naye Mkuu wa Mkoa wa Simiyu Mh. Dkt. Yahaya Nawanda alimshukuru Waziri huyo wa Kilimo kwa kuridhia kuadhimisha siku ya Chakula Duniani Kitaifa katika mkoa wa Simiyu tena kwa miaka miwili iyajo. Alieleza kuwa jambo hili litaleta tija na kuinua sekta ya Kilimo katika Mkoa wa Simiyu kwani Wakulima watapata fursa ya Kujifunza mambo mengi yanayohusu kilimo bora.

Baada ya kuhitimisha sherehe za maadhimisho hayo yaliyofanyika katika Uwanja wa Halmashauri ya Mji wa Bariadi Waziri Bashe alielekea Kata ya Dutwa iliyopo Halmashauri ya Wilaya ya Bariadi  kwaajili ya kuzindua zoezi la ugawaji wa Mbegu za Pamba msimu wa Kilimo 2022/2023 katika AMCOS ya Itemelo.