KAMATI YA MIKOPO BARIADI YAFANYA UKAGUZI WA VIKUNDI VYA WANUFAIKA

Posted on: September 29th, 2025

Kamati ya Mikopo ya Halmashauri ya Wilaya ya Bariadi, leo tarehe 29 Septemba 2025, imefanya ukaguzi wa vikundi mbalimbali vilivyoomba na kunufaika na mikopo ya asilimia 10 ya mapato ya ndani yasiyolindwa ya Halmashauri.

Miongoni mwa vikundi vilivyotembelewa ni:

• Kikundi cha “Jitume Mwantimba” – kinachojishughulisha na huduma za upishi, ukodishaji wa viti na vyombo.
• Kikundi cha “Elimika Masewa” – kinachojihusisha na ufugaji wa mbuzi na kondoo.

Aidha, Kamati pia ilitembelea watu wenye mahitaji maalumu akiwemo Tereza Mbogo Mayuma wa Kata ya Sapiwi anayejishughulisha na huduma ya chakula, pamoja na Kikundi cha “Walemavu Kwanza Ikungulyabashashi” ambapo baadhi ya wanachama wanajihusisha na upigaji picha, ukodishaji wa viti na biashara ya mifugo.

Hadi sasa, Halmashauri ya Wilaya ya Bariadi imetoa jumla ya Tsh. milioni 259.02, sawa na asilimia 10 ya mapato ya ndani yasiyolindwa. Fedha hizo zimenufaisha vikundi 31, vikiwemo:

• Vikundi 19 vya wanawake
• Vikundi 9 vya vijana
• Vikundi 3 vya watu wenye mahitaji maalumu

Kwa mujibu wa Afisa Maendeleo ya Jamii, Bi. Amina Mwaka, hatua hii inaendelea kuimarisha utekelezaji wa sera ya Serikali ya kuwezesha wananchi kiuchumi kupitia mikopo yenye masharti nafuu.