Kiongozi wa Mbio za Mwenge Apongeza Kituo cha Mafunzo ya Kilimo, Mifugo, Uvuvi na Mazingira Bariadi

Posted on: August 13th, 2025

Bariadi, 13 Agosti 2025 — Kiongozi wa Mbio za Mwenge wa Uhuru wa Kitaifa, Ndg. Ismail Ali Ussi, ameipongeza Halmashauri ya Wilaya ya Bariadi kwa mradi wa kipekee wa Kituo cha Mafunzo ya Kilimo, Mifugo, Uvuvi na Uhifadhi wa Mazingira kilichopo Kata ya Dutwa, akisema ni jambo la mfano wa kuigwa katika nchi.

"Naamini hii ndiyo itakuwa stori ya pekee kwenye vyombo vya habari siku ya leo, maana katika mikoa 22 tulikopitia hatujakutana na mambo kama tuliyoyaona hapa. Nakupongeza sana Mkurugenzi Mtendaji wa Halmashauri ya Wilaya ya Bariadi," alisema Ndg. Ussi.

Kauli hiyo aliitoa wakati Mwenge wa Uhuru ulipopita kukagua mradi huo unaotekelezwa kupitia Mapato ya Ndani ya Halmashauri, ukiwa na thamani ya Shilingi milioni 53.3

Historia na Lengo la Kituo

Akizungumza mbele ya kiongozi huyo wa Mwenge, Afisa Kilimo wa Wilaya, Ndg. Salim Hamad, alisema Kituo cha Rasilimali za Kilimo cha Bariadi kilianzishwa mwaka 2012 na kuhuishwa mwaka 2022, kikiwa na lengo la:

• Kutoa mafunzo na elimu kwa wakulima na wafugaji juu ya teknolojia na mbinu bora za uzalishaji.
• Kutoa huduma za ushauri na kufanya tafiti za kilimo, mifugo, uvuvi na uhifadhi wa mazingira.
• Kuhamasisha matumizi ya nishati safi ya kupikia na uhifadhi wa mazingira.

Kituo kina jumla ya ekari 10, ambapo kwa sasa ekari 4.5 ndizo zinazotumika kikamilifu.

Shughuli Zinazotekelezwa

Kituo kimekuwa kikitekeleza shughuli mbalimbali ikiwemo:

• Uzalishaji wa mazao kama mikunde, nafaka, mazao ya mafuta na mbogamboga.
• Ufugaji wa mbuzi, kondoo, ndege wa aina mbalimbali na samaki aina ya sato.
• Uzalishaji wa miche ya miti zaidi ya 72,253, ikiwemo ya matunda, kivuli, dawa na mbao.

Manufaa kwa Jamii

Miongoni mwa faida za mradi huu ni:

• Kuwajengea uwezo wakulima na wafugaji kukabiliana na mabadiliko ya tabianchi.
• Kuendeleza ufugaji wa kibiashara.
• Kuhamasisha jamii kuhifadhi mazingira na kutumia nishati safi.

Shukrani kwa Uongozi wa Taifa

Halmashauri imetoa shukrani kwa Mheshimiwa Rais Dkt. Samia Suluhu Hassan kwa utekelezaji wa Ilani ya CCM katika sekta za kilimo, mifugo, uvuvi na uhifadhi wa mazingira, hususan kupitia masharti ya Ibara ya 9C(i) na (ii) na Ibara ya 253(j) ya Ilani ya CCM.

"Tunaahidi kuulinda na kuutunza mradi huu ili uendelee kuwasaidia wananchi wa Halmashauri ya Wilaya ya Bariadi kama ilivyokusudiwa," ilisisitiza uongozi wa kituo.