MAFUNZO YA WASIMAMIZI WASAIDIZI WA UCHAGUZI NGAZI YA KATA (ARO KATA) YAHITIMISHWA RASMI WILAYANI BARIADI

Posted on: August 6th, 2025

Bariadi, 06 Agosti 2025

Mafunzo ya siku tatu kwa Wasimamizi Wasaidizi wa Uchaguzi ngazi ya Kata (ARO Kata) kuelekea Uchaguzi Mkuu wa Oktoba 2025 yamehitimishwa rasmi katika ukumbi wa Halmashauri ya Wilaya ya Bariadi.

Akizungumza wakati wa kufunga mafunzo hayo, aliyekuwa Mwenyekiti wa Mafunzo, Ndg. Lameck Mkililia (ARO Kata – Masewa), aliwashukuru ARO wote kwa ushirikiano na kujituma kwao kuanzia siku ya kwanza hadi mwisho wa mafunzo.

“Nawapongeza kwa moyo wa kujitolea, kujifunza na kushirikiana katika kipindi chote cha mafunzo. Ushirikiano huu ndiyo msingi wa ufanisi katika kusimamia uchaguzi kwa haki na amani,” alisema Ndg. Mkililia.

Wakati wa mafunzo, Wawezeshaji kutoka Halmashauri waliwakumbusha ARO Kata kuendelea kujisomea Kanuni za Uchaguzi, Mwongozo wa Wasimamizi, na kuzingatia misingi ya uadilifu ili kuepuka migogoro, manyanyaso au uvunjifu wa sheria katika kipindi chote kuelekea na wakati wa uchaguzi.

Mafunzo hayo yalilenga kuwawezesha ARO Kata kutekeleza majukumu yao kwa weledi, kuanzia maandalizi ya vituo, usimamizi wa upigaji kura hadi uhakiki wa matokeo.

“Tunategemea kuona uchaguzi wa haki, huru na wa kuaminika. Ninyi mna nafasi kubwa ya kuhakikisha hilo linatimia,” aliongeza mmoja wa Wawezeshaji.

Mafunzo yalifanyika kwa siku tatu mfululizo kuanzia tarehe 4 hadi 6 Agosti 2025, yakihusisha mada mbalimbali za kiutendaji na mazoezi kwa vitendo.

 Mwisho

Imetolewa na:
Kitengo cha Habari na Mawasiliano
Halmashauri ya Wilaya ya Bariadi