MKURUGENZI BARIADI DC AFANYA ZIARA KUSIKILIZA CHANGAMOTO ZA WATUMISHI

Posted on: November 10th, 2022

Mkurugenzi wa Halmashauri ya Wilaya ya Bariadi Ndg. Halidi  Mbwana amefanya ziara katika Tarafa ya Nkololo kusikiliza changamoto za watumishi waliopo katika kata za Nkololo, Ihusi, Mwaumatondo, Mwaubingi, Nkindwabiye na Mwadobana.

Watumishi kutoka kata za Nkololo, Ihusi, Nkindwabiye na Mwaumatondo wakiwa kwenye Mkutano na Mkurugenzi wa Halmashauri ya Wilaya ya Bariadi

Mkurugenzi huyo akiwa ameambatana na timu ya Wataalamu kutoka idara za Elimu msingi na sekondari, Utumishi, Afya, Kilimo na Mifugo pamoja na Kitengo cha Mawasiliano serikalini alifafanua lengo kuu la ziara hiyo kuwa ni kusikiliza changamoto mbalimbali za kiutumishi zinazowakabili watumishi waliopo katika kata hizo na kuzipatia ufumbuzi.

“Hatujaja kuhutubia, tumekuja kuwasikiliza nyinyi ili kutatua kero zenu hivyo muwe huru kuzungumza aina yoyote ya changamoto ya kiutumishi ambayo inawakabili” alisisitiza Mkurugenzi huyo.

Watumishi waliohudhuria mkutano na Mkurugenzi wa Halmashauri ya Wilaya ya Bariadi wakieleza changamoto zao za kitumishi

Aidha miongoni mwa changamoto zilizowasilishwa na watumishi katika mkutano huo ni pamoja na mapunjo ya mshahara, changamoto ya fedha za likizo, changamoto ya fidia kwa watumishi wanapoumia mahala pa kazi nk. Mkuu wa Idara ya Utumishi Halmashauri ya Wilaya ya Bariadi Bi. Shakira Hamis aliweza kuzipatia ufumbuzi changamoto hizo papo hapo na wachache miongoni mwao walitakiwa wafike Ofisi ya Mkurugenzi kwaajili ya hatua zaidi ili kuweza kumaliza changamoto hizo.

Watumishi wakisikiliza kwa makini changamoto na hoja mbalimbali zinazowasilishwa katika mkutano na mkurugenzi wa Halmashauri ya wilaya ya Bariadi

Nao Watumishi waliohudhuria kwenye mkutano huo walitoa pongezi kwa Mkurugenzi wa halmashauri ya Wilaya ya Bariadi kwa kuandaa mkutano huo ambao umewarahisishia watumishi walio wengi kutatua changamoto zilizokuwa zinawakabili pasipo kwenda Ofisini.

Mkurugenzi wa Halmashauri ya Wilaya ya Bariadi (aliyevaa koti) akiwa na wajumbe wa mkutano waliopo meza kuu

Ziara hiyo ya Mkurugenzi wa Halmashauri ya Wilaya ya Bariadi ni muendelezo wa ziara zake za kukutana na watumishi wote wa Halmashauri ya Wilaya ya Bariadi waliopo katika kata na vijiji, hapo awali alifanya ziara katika tarafa ya Mhango na kukutana na watumishi wa kata za Kilalo, Ngulyati, Kasoli, Gambosi, Mwasubuya, Sakwe na Itubukilo hivyo kusalia tarafa ya Dutwa ambayo nayo ipo kwenye mpango wa ziara yake.