MKUU WA MKOA WA SIMIYU AFANYA MKUTANO MKUU NA VIONGOZI NA WATAALAM KUJADILI MAENDELEO YA SEKTA YA KILIMO

Posted on: October 7th, 2022

Mkuu wa Mkoa wa Simiyu Mh. Dkt. Yahaya Nawanda amefanya Mkutano Mkuu wa Wataalam na Viongozi wa ngazi mbalimbali kujadili maendeleo ya Sekta ya Kilimo katika Mkoa wa Simiyu. Mkutano huu ulihudhuriwa na wakuu wa Wilaya zote zilizopo Mkoa wa Simiyu, Wakurugenzi wa Halmashauri zote mkoani humo, Maafisa Tarafa, Watendaji wa kata, Maafisa Ugani  pamoja na Watendaji wa  Vijiji na Mitaa yote katika mkoa wa Simiyu.
Akizungumza katika Mkutano huo Dkt. Nawanda alibainisha lengo la Mkutano huo mkubwa ni kujadili maendeleo ya Sekta ya Kilimo katika Mkoa wa Simiyu ikiwa ni pamoja na kupeana hamasa,kujadili changamoto na mbinu mbalimbali ambazo zitainua Sekta ya Kilimo katika Mkoa wa simiyu.

              Baadhi ya Washiriki wakiwa katika Mkutano wa Mkuu wa Mkoa wa Simiyu

Dkt. Nawanda aliweka wazi kuwa lengo kubwa katika msimu huu wa kilimo ni kuifanya Simiyu kuwa mzalishaji mkuu wa Pamba nchini Tanzania. Kwa timu hii niliyonayo na leo tumekuja kuwa watu wamoja na tunaendeleza umoja wetu, tunataka tumhakikishie Mh. Rais sisi hapa watu wa Simiyu tunaenda kuzalisha zaidi ya asilimia 70 ya Pamba yote katika nchi hii ili wengine wote waje wajifunze Simiyu, na hilo linawezekana " alisisitiza Dkt. Nawanda

             Baadhi ya Wakuu wa Wilaya zilizopo katika mkoa wa Simiyu wakiwa katika Mkutano

Aidha Mkuu huyo wa Mkoa alitoa muda wa Mwezi mmoja kuhakikisha wakulima wote katika mkoa wa Simiyu wanasajiliwa na taarifa zao muhimu zinarekodiwa lengo ni kuhakikisha takwimu sahihi kuhusu wakulima hao zinapatikana jambo litakalosaidia katika utoaji wa huduma mbalimbali  kama vile ugawaji wa Pembejeo za kilimo na viuwa wadudu.

                Baadhi ya wajumbe wa Mkutano waliokuwa wameketi meza kuu

Nao baadhi ya washiriki wa Mkutano huo walitoa shukrani za dhati kwa Mkuu huyo wa Mkoa kwa kutambua umuhimu wao katika kuinua Sekta ya Kilimo pia walieleza changamoto ya Viua wadudua vinavyoletwa  kutofanikiwa kwa asilimia kubwa kudhibiti wadudu waharibifu hasa kwenye zao la Pamba jambo ambalo Mwakilishi kutoka Bodi ya Pamba aliahidi kufatilia kwa kina na kulitafutia ufumbuzi kwa wakati.