MWENYEKITI WA TALGWU AWASIHI WANACHAMA WAKE KUTOJIONDOA KWENYE CHAMA HICHO

Posted on: October 4th, 2022

Mwenyekiti wa Chama cha Wafanyakazi wa Serikali za Mitaa (TALGWU) ambaye pia ni Rais wa Shirikisho la Vyama vya Wafanyakazi Tanzania (TUCTA) Ndg. Tumaini Nyamhokya amewasihi wanachama wa TALGWU kutojiondoa uanachama.

Rai hiyo imetolewa  alipokuwa katika ziara ya kutembelea Matawi ya TALGWU yaliyopo wilayani Bariadi Mkoani Simiyu. Ndg. Nyamhokya alibainisha kuwa wapo baadhi ya Wafanyakazi wa Serikali za Mitaa ambao huamua kujitoa kwenye chama hicho hali ambayo hupelekea kukosa utetezi pale wapatapo changamoto mbalimbali za kiutumishi.

       Baadhi ya wanachama wa TALGWU tawi la Dutwa Hospitali wakiwa kwenye mkutano na Mwenyekiti wa chama hicho

Aidha Ndg. Nyamhokya aliendelea kusisitiza kuwa TALGWU ipo imara kutetea haki na maslahi ya wanachama wake hivyo panapotokea changamoto zozote za kiutumishi ni vyema kuwasiliana na viongozi wa TALGWU wa ngazi mbalimbali ili waweze kupewa msaada kuliko kufanya maamuzi ya kujiondoa uanachama.

        Mwenyekiti wa TALGWU (wa kwanza kushoto) pamoja na wajumbe waliokaa meza kuu wakiimba wimbo wa Mshikamano

Ziara ya Mwenyekiti huyo wa TALGWU ni miongoni mwa Ziara zake za kikazi ambazo huzifanya mara kwa mara katika mikoa mbalimbali nchini lengo likiwa ni kukutana na wanachama wake wa maeneo tofauti tofauti na kusikiliza changamoto mbalimbali zinazowakabili wanachama hao vilevile kupeana mrejesho wa mambo mbalimbali yanayoendelea kuhusu chama hicho.